Saturday, June 16, 2012

"Shraddhanjali!!!"

K Mehfilein, tere bina phir bhi adhoori rahengi, 
Log teri Chaukhat pe, phir bhi intezar karenge, 
Aahatein toh hongi, bas tum na hoge, tum na hoge!!! 

















RIP Mehdi Hassan Saab!!!

















Saturday, May 19, 2012

-----------------------------------------------------------------------------------
Kiye the jinmein zikr tera,
Udd gaye woh kaagaz ke tukde kahan.
Na jaane ab woh waqt kahan, na jaane ab woh tukde kahan.
Chamakte the jugnu jahan,
Kho gayi javaan woh raatein kahan.
Na jaane ab woh jugnu kahan, na jaane ab woh raatein kahan.
Bheege the jinmein aansu bhi mere,
Beh gaye geele woh saavan kahan.
Na jaane ab woh aansu kahan, na jaane ab woh saavan kahan.
-----------------------------------------------------------------------------------

Monday, May 7, 2012


Raat k dhaaee baje ghadi bhi so chuki thi, humne Shastri ke ghar se alvida kiya aur jab neeche utar kar bike k paas pahuche toh maajra samjh mein aaya. Bike jo giri padi thi, uthaya toh usne bhi thodi saans li. Nirlajon ne dedh sau gram petrol bhi nahi chhoda tha, aisa lag raha tha mano bike k saath gang rape hua ho. Pandrah minute koshish karne k paschaat jab petrol pipe lagane mein hum na-kaamyab rahe tab Yadav ne, pipe kaise fit kiya ja sakta hai, ye samajhne ki koshish google mein shuru kar di. Jab google aur wikipedia bhi haar gaye tab hamne socha k chalo, ab ghar magic hour mein hi niklenge. Hum wapis Shastri k ghar jaa hi rahe the k kuchh log raaste k ek kone par thandi beer ka maza lete nazar aaye. Humne kaha chalo ek baar inse bhi baat karke dekhte hain, shayad kuchh madad mil jaye. Hum unke paas pahuche, apna kissa sunaya toh unmein se ek banda jiske paanv mein plaster do din pehle hi cricket match mein catch lete waqt laga tha, uth khada hua. Chaar log aur apni apni beer aur tippanniyaa/ raai lekar pahuche. Kuchh der mein jab unki beer utri toh unmein se ek ne kaha k bhai munna mechanic toh yahi peechhe rehta hai usse bulao, jaise hi ye humne suna toh Yadav aur meri nazrein muskura uthi. Langde tyagi ne Munna ko bulaya. Badi mashaqqat k baad usneendi haalat mein Munna Mechanic ne pravesh kiya aur uske aate hi sab peechhe hat gaye. Paas padi beer k do ghoont lagane k baad Munna ne gaadi ko pal bhar k liye bhanpa aur jhoomte huye bola k screw driver lao, usne pehle hi addhi chadhaaee huyi thi. Thakker ki gaadi mein screw driver bhi, bade size k nikle, saale ne yahan bhi apni gujju akal lagayi. Ab maamla sangeen ho chuka tha, Munna full form mein aa chuka tha. Usne doosre taraf se pipe ko jaise taise palbhar mein hi jod diya. Sabki aankhein chaundhiya gayi, sab stabdh reh gaye. Hum sab iss soch mein pad gaye k ye kaise ho gaya. Munna ne aakhir, kar dikhaya. Gaadi chaalu ho gayi. Jaate jaate Munna ne Langde tyagi ki beer k do ghoont aur lagaye aur bola k seedhe andheri teshan jao aur pehle petrol bharao. Hamare paas usse dene k liye koi shabd nahi the aur paise lene se usne inkaar kar diya. Phir hamne Langde tyagi se usse bolne ko kaha k ye uski mehnat ki kamaaee hai, tab kahi jaakar usne paise liye.
Hamne rukh kiya andheri teshan ki ore. Petrol pump pahuchne se pehle hi gaadi band pad gayi. Jaise taise hum gaadi ghaseet-te huye pump pahuche, jaan mein jaan aayi. Petrol bhar waya aur turant ghar k liye ravana huye. Ghadi, jo iss sab ke chalte jaag chuki thi, usneendi haalat mein sava teen baja rahi thi. Goregaon flyover par gaadi ne phir aankh micholi khelna shuru kar diya tha aur woh aakhirkaar phir band pad gayi. Iss baar hamein kuchh samajh nahi aaya. Yadav ki laakh koshishon k baad bhi woh shuru nahi hui. Dimaag k parkhachche ud chuke the kyunki ghar abhi paas hote huye bhi bahut duur tha. Thodi der flyover par gaadi ghaseetne k baad jab dhalaan aayi toh humne slo-mo shots ka anand liya. Thandi havaayein, bagal se sau ki speed mein nikalti gaadiyan aur bees-tees ki speed se ludhakte hum. Kaafi dilchasp nazara tha. Hum, andaaz apna apna k Amar-Prem lag rahe the. Do deewane shehar mein, hum gana gaate gaate jab ludhakte huye neeche pahuche toh dhalaan khatm hone k saath gaadi khadi ho gayi. Mann kiya k thakker ki gaadi ko yahin chhod dete hain. Kabhi hum gaaliyan Thakker ko toh kabhi uski gaadi ko dete. Yadav ne gaadi phir se shuru karne ki thaani par woh bhool gaya k abki baar thakker ki gaadi petrol se nahi, khaakhre- theple se hi chalegi. Humne phirse ghaseetna shuru kiya.Kuchh der baad adhmari haalat mein hum Oberoi mall pahuche. Bhookh kaafi badh chuki thi, kisi bhi idli ya coffee wale ka kahin koi nishaan nahi tha. Pyaas bhi itni lag rahi thi k ek baar toh mann kiya k paseena hi pi jayein. Oberoi mall se ghar ki doori agar paidal chalkar tai karein toh pandrah se bees minute, bus se agar tai karein toh saat se aath minute aur chalti haalat ki bike se agar tai karein toh chaar se paanch minute. Baharhaal humne paidal, bike k saath kabhi ye safar tai nahi kiya tha toh iska koi andaaza nahi tha. Chadhaan bahut zyada thi. Kuchh der aur mann maar k gaadi ghaseeti toh dindoshi pahuche. Aisa mehsus hua k maano chaar-dhaam ki yaatra karke laute ho. Thoda ruke toh duur ek coffee wala nazar aaya. Dil wapis garden garden hone laga, achanak shareer ko shakti mili aur hum coffee wale k paas pahuche. Sabse pehle toh hum dus minute ped k neeche let gaye, saans jab kaabu mein aa gayi toh humne paani piya aur phir coffee. Nazar ghumaaee toh ghadi bhi auron ki tarah apni morning walk k liye nikal chuki thi. Kutton ne bhaunkna band kar diya tha, dhoodhwale apni dukaan khol rahe the aur paper wale rozmarra ki tarah, road par hi apna dhandha phaila chuke the.
Coffee ki chuskiyon k baad jab dobara himmat badhi toh akhirkaar marte marte hi sahi hum ghar pahuche. Abtak ghadi bhi apni morning walk se wapas aa chuki thi aur sava paanch baja rahi thi. Gaadi ko compound mein khadi karne k baad pal bhar k liye humne gaadi ko dekha, Yadav aur main, dono ekbar muskuraaye aur gaadi ko tata-bye bye karke apne apne gharon ki aur nikal pade. Akhirkaar hamne fateh haasil kar hi li aur iss tarah ye qissa yahan khatm hua.

Wednesday, January 6, 2010

Aman ki Aashaa...

Akhirkaar...Ikattees disambar khatm hua aur subah hui do hazaar dus ki.divaal-ghadi mein bhi naye saal ka savera ho chuka tha aur jab maine samay par dhyan diya toh subah ke nau baje the.fauran maine akhbaar lene ke liye apne ghar ka darvaja khola aur akhbaar ka pehla panna dekhte hi meri neend ud gayi,maine apni aankh malee,akhbaar ke us pehle panne par dubara nazar daali,ye sochkar ki jo maine abhi dekha,jo padha,vo mehaz ek mazaak hai,ek ittefaaq hai ...par shayad nahi...aisa kuch bhi nahi tha,voh sab sachchaee thi,ek achchaee thi...ek nayi ummeed ki,nayi shuruaat ki.
Kuch der toh mujhe vishvaas hi na hua kyunki uss akhbaar mein koi dil dehla dene vaali khabar nahi likhi thi balki uss mein sirf do shabd likhe the aur un do shabdon mein...saari kahani.Uss akhbaar ke voh do shabd halanki iss desh ke har aadmi ka dil dehla sakte the aur meri tarah iss desh ke har aadmi ki neend ek pal mein udaa sakte the...ab aap zaroor is soch mein pad gaye honge ke aakhir vo do shabd aise kya the jo is desh ke har aadmi ka dil dehla sakte hain...toh main apko akhirkaar batana chahunga ke voh do shabd kuch aur nahi balki pyar ke do meethe bol the,ummeed ki ek nayi kiran thi jo do mulkon ke do akhbaar-vaalon ne "AMAN KI AASHA" naam dekar do hazaar dus ki pehli kiran ke pehle akhbaar ke pehle panne se shuru ki aur jis se meri neend ek pal mein hi ud gayi,usmein sirf bade-bade aksharon mein itna hi likha tha..."LOVE PAKISTAN".
Ab zaahir hai ke aapke zehen mein in dono shabdon ka matlab saaf ho gaya hoga aur aapke dil ki dhadkan fir se shaant ho gayi hogi aur voh ab apni ausatam tezi se chal rahi hogi par agar hum baat karein toh ye koi pehli baar nahi hai jab kisi ne aisi koi shuruaat kari balki ye silsila toh pichchle najaane kitne saalon se chala aa raha hai par iska abhi tak koi hal nahi nikla aur ye bhi pata nahi ke kab niklega...aur toh aur ab toh ye haalaat hain ke hum kisi aur se pyar karne ki baat toh door,apne hi desh ke logon se pyar nahi kar paa rahe hain,apne hi ghar ke logon se door hote chale jaa rahe hain,deevaaron pe deevaar khadi karte ja rahe hain,apne hi desh ke hazaar tukde karte chale ja rahe hain...batvaara karte ja rahe hain...
Main aapse kuch karne ke liye bilkul bhi nahi kahunga kyunki main toh khud ek kaayar hoon...aap hi ki tarah,maafi chahunga par ye ek sachchaee hai,hum sab kisi na kisi roop mein kaayar hain...Haan kaayar.Par iske ba-vajood hum agar kuch kar sakte hain toh sirf pyaar...Hum,kam se kam,ek-doosre se pyaar toh kar hi sakte hain aur ismein hamari koi dhan-daulat bhi nahi jayegi aur shayad isse achcha aur koi upaay door-door tak mujhe dikhaee bhi nahi deta,ummeed hai aap bhi is baat par yakeen karenge...Haan shuruaat mein thodi takleef zaroor hogi par anjaam bahut khoobsurat.
Toh ab...faisla aapke haath mein hai,hamare haath mein hai...doston gaur karna apne desh mein bahut kam hi faisle aise hote hain jo hamare haath mein hote hain kyunki baaki saare faisle toh sarkar karti hai aur hamari sarkar ki tarah kahin hum bhi der na kar baithein.........insan ho insan se pyar karo.Aao is shuruaat ko apni manzil tak pahuncha de.

Monday, July 20, 2009

Insan....

Insan............

Kuch Hindu,kuch Isaaee,kuch Sikh toh kuch Musalman ho gaye,
Har Insan apni insaniyat yahan is kadar kho gaye.
Kuch kaagaz ke chand rupayon mein bik gaye,
Kuch mitti ki in sarhadon mein bat gaye.
Kuch papi,toh kuch dharm ke saathi ho gaye,
Aur jo baki reh gaye woh inke saaye mein yahan neta ho gaye.
Kuch jihadi toh kuch apni hi zid mein kho gaye,
Har insan yahan na jane kya ho gaye.
Ooparvale(mandir-masjid) ke batvaare mein sab is kadar doobe,
ke apni hi zindagi ke muhaavre ho gaye.
Wah re Khuda ke ae Insan hum itne gir gaye,
Bas ek Insan na rehkar hum baki sab ho gaye...

Friday, June 12, 2009

Uss buzurg Pedh ke naam...........

Uss Buzurg pedh ke naam

Har roz ki tarah uss din bhi savere main chai ka pyala liye purani khidki par khade chai pi raha tha ke achanak meri nazar uss boodhe pedh par padi jise maine apne dadaji ke guzar jane ke baad Daddu ka naam diya tha.

Mujhe unse mile kuch zyada samay na hua tha magar jaise…hamara ek rishta kayam ho chuka tha. Jab bhi main apne aap ko is anjan sheher mein akela pata, hamesha unke paas chala jata aur uss pedh ke neeche jaakar baith jata. Mujhe unse ek alag sa lagaav ho gaya tha isliye jab kabhi mujhe apne savaalon ke javab dhoondne mein pareshani hoti, main hamesha un daddu ki chhaanv mein chala jata aur unse guftgu karta aur mano jaise saare savaalon ke javaab mujhe apne aap hi mil jate…

Shayad isiliye kisi ne sach hi kaha hai ke buzurgon ke chehre par padi un jhurriyon ko padho,tumhe apne saare savaalon ka javab un mein mil jayega…Jab kabhi main rota toh woh mujhe hansate or jab kabhi woh udaas rehte toh main unhe hansata. Bas isi tarah mujhe ek anjaan sheher mein phir apne daddu mil gaye aur mera akelapan door ho gaya…Bas isi tarah saal beet te chale gaye aur hamari dosti bhi gehri hoti chali gayi…

Main apni chai khatm karke unse milne gaya toh mausam ekdum badla hua tha…kal tak jo suraj apne charam par hua karta tha aaj uska kahin koi thikana na tha, kal tak jo panchhi garmi ke darr se apne ghounslon mein chhipe rehte the, aaj unhone saare aasman par kabza kar liya tha…

Maine Daddu se poocha ke Daddu akhir majra kya hai, toh Daddu ne muskura kar javab diya aur bole ke beta poore ek saal se hum sabko jiska intezar hai Woh Barkha Rani ab se kuch hi samay mein apne poore aagosh ke saath aa rahi hai,Ye paigam der raat ooparvale ne chund boondon ki baarish karke bheja hai…Isiliye ye panchhi aaj apni hi masti mein mast hain,ye pedh apni baahein failaye besabri se uska intezar kar rahein hain aur indra-dhanush bhi aaj bahar aane ko betaab ho raha hai…Har jagah khushi ka nazara tha ke achanak maine Daddu ke chehre par ek udaasi dekhi toh poocha ki Daddu aap achanak udaas kyun ho gaye. Iss par Daddu muskuraye aur bole beta main poore ek saal se iss din ka intezar kar raha tha aur aaj akhir kar ye din aa hi gaya…Mere jaane ka waqt aa gaya, ye baarish meri zindagi ki aakhri baarish hogi,main bas isi din ke liye ruka hua tha…Sachchai se milne ka mera waqt aa gaya…Beta maut ek sachchai hai aur isse hamein darna ya bhagna nahi chahiye balki hamein toh iska svagat karna chahiye kyun ki hum chah kar bhi isse rok nahi sakte…Tabhi achanak zor ki hawa chali aur main apne Daddu se lipat gaya aur zor-zor se rone laga.Kuch der mein zor ki baarish bhi shuru ho gayi aur toofan bhi badhta gaya,tabhi Daddu ne mujhe aakhri baar muskurakar dekha aur bole beta meri aakhri baat maan aur ghar ja…Main na chahte hue bhi rote-rote apne ghar aa gaya…aur isi tarah dekhte hi dekhte meri aankhon ke samne Daddu ne apna dum tod diya aur zameen se alagh ho gaye…Uss din phir ek baar main akela ho gaya…

Aaj uss baat ko poore do saal beet gaye par aaj bhi mujhe unki kami sabse zyada khalti hai…Dost mile par unsa koi nahi mila aur shayad mil bhi nahi payega kyunki jitney achche se woh mujhe samajhte the,koi aur shayad samajh hi nahi paya…Aaj bhi jab kabhi mujhe akelapan mehsus hota hai ya phir kabhi unki yaad aati hai…ya kabhi rone ka man karta hai,main ussi jagah chala jaata hoon jahan kabhi mere Daddu “woh boodha pedh” hua karte the…